خواجہ آصف کا بیان اپنی جگہ لیکن انتخابی اصلاحات کے بعد ہی انتخابات ہوں گے، آصف زرداری

پیپلزپارٹی کے شریک چیئرمین آصف علی زرداری کا کہنا ہے کہ گزشتہ رات نواز شریف سے بات کی اور انہیں سمجھایا کہ جیسے ہی انتخابی اصلاحات ہوں الیکشن کرائیں۔

کراچی میں پریس کانفرنس کرتے ہوئے سابق صدر آصف علی زرداری نے کہا کہ میں سن رہا ہوں اور دیکھ رہا ہوں ، میں کہتا رہا کہ یہ الیکشن دھاندلی کے ہوئے ہیں تو کسی نے مانا نہیں اور کسی نے سنا نہیں، اس کے وقت کے سلیکٹڈ نے بھی نہیں سنا۔

انہوں نے کہا کہ اب ہم سب نے ملکر حکومت بنا لی ہے تو وہ چاہ رہے ہیں کہ انتخابات کروائیں لیکن ہم نے بھی الیکشن کروانے سے انکار نہیں کیا، البتہ ہمیں پہلے انتخابی اصلاحات کرنے ہیں ، نیب ریفارم کرنے ہیں ،ان کا نعرہ ہے الیکشن جلدی کرائیں اور اس حوالے سے گزشتہ رات نواز شریف سے بھی بات کی  اور انہیں سمجھایا کہ جیسے ہی الیکشن اصلاحات ہوں فوری الیکشن کرائے جائیں۔

آصف زرداری کا کہنا تھا کہ ہم نے اسٹاک ایکسچینج کھڑا کرنا ہے ، پرویز مشرف دور کے بعد ہم بھی اسٹاک ایکسچینج کھڑا کیا ، جب تک آئی ایم ایف کا پروگرام نہیں آجاتا ہمیں مشکلات ہوں گی ، ابھی نئی حکومت آئی ہے حالات کنٹرول کرنے میں تھوڑا وقت لگتا ہے۔