ملک بھر میں آج عید الفطر مذہبی عقیدت و احترام کے ساتھ منائی جارہی ہے
کراچی: ملک بھر میں آج عید الفطر مذہبی عقیدت و احترام اور جوش و جذبے کے ساتھ منائی جارہی ہے۔
وفاقی دارالحکومت اسلام آباد، کراچی، لاہور اور پشاور سمیت ملک کے تمام چھوٹے بڑے شہروں کی مساجد اور عید گاہوں میں نماز عید کے اجتماعات منعقد کیے گئے جس میں ملکی سلامتی، ترقی اور بقا کے لیے خصوصی دعائیں کی گئیں۔
عید الفطر کے موقع پر وفاقی دارلحکومت سمیت تمام چھوٹے بڑے شہروں میں سیکیورٹی کے سخت انتظامات کیے گئے ہیں جبکہ چاند رات پر بازاروں میں عوام کا کافی رش دیکھنے کو ملا۔
نماز عید کی ادائیگی کے بعد شہریوں نے اپنے مرحومین کی قبروں پر حاضری کے لیے قبرستانوں کو رخ کیا جبکہ قبرستانوں کے باہر پھولوں کے اسٹالز کی ایک بڑی تعداد دیکھنے کو ملی۔
صدر مملکت عارف علوی نے اسلام آباد کی فیصل مسجد میں عید کی نماز ادا کی جبکہ عید الفطر کے موقع پر انہوں نے پیغام دیا کہ ’عید کا دن خوشیاں بانٹنے اور اپنے معاشرے کے محروم طبقے کے لیے ایثار و قربانی کا دن ہے‘۔
ان کا کہنا تھا کہ عید کی حقیقی خوشی تب ہی مل سکتی ہے جب ہم دوسروں کو بھی اپنی خوشیوں میں شریک کریں۔
علاوہ ازیں وزیر اعظم شہباز شریف نے جاتی امرا لاہور میں عید کی نماز ادا کی جبکہ ان کے ہمراہ وزیراعلیٰ پنجاب اور ان کے بیٹے حمزہ شہباز بھی موجود تھے۔
وزیراعظم اور وزیراعلیٰ پنجاب نے ملکی سلامتی اور استحکام کے لیے دعا کی، نماز عید کے بعد لوگوں سے گلے ملے اور عید کی مبارکباد پیش کیں۔
