وزیر اعلیٰ پنجاب مریم نواز شریف کی زیر صدارت خصوصی اجلاس منعقد کیا گیا۔
اجلاس میں امن وامان کی صورتحال کا جائزہ لیا گیا، آئی جی پنجاب نے صوبے میں امن و امان کی صورتحال پر وزیر اعلیٰ کو بریفنگ دی۔
وزیراعلیٰ پنجاب نے کرائم پر ڈیلی اپ ڈیٹ رپورٹ طلب کرلی، مریم نواز نے دھاتی تار بنانے، بیچنے اورخریدنے پر کریک ڈاؤن کا حکم دیا۔ انہوں نے کہا کہ زیرو ٹالرنس کی پالیسی اپنائیں۔
وزیر اعلیٰ نے اسلحہ کی نمائش روکنے کے لیے قانون پرعملدرآمد کے لیے فوری اقدام کا حکم دیا۔
اجلاس میں منشیات کی ترسیل روکنے کے لیے فول پروف نظام تیار کرنے پر اتفاق کیا گیا، وزیر اعلیٰ نے کہا کہ منشیات فروشوں کے خلاف ناقابل تردید ثبوت کے ساتھ کیس بنائیں۔
وزیر اعلیٰ نے کہا کہ پنجاب میں کہیں نوگو ایریا بنانے کی اجازت نہیں دیں گے، وزیر اعلیٰ نے پنجاب کا پتنگ بازی کے پے در پے واقعات پر تشویش کا اظہار کیا۔
انہوں نے کہا کہ پتنگ کے تار سے جاں بحق بچے کی وڈیو دیکھ کر دل کانپ گیا، معصوم بچے کی جان جانے سے والدین کی دنیا تباہ ہو گئی اور قانون پرعملدرآمد کے لیے جنگی بنیادوں پر اقدام کی ضرورت ہے۔
وزیر اعلیٰ پنجاب مریم نواز شریف نے مزید کہا کہ زیادتی کے واقعات میں کمی آنی چاہیے،خصوصی اقدام کیے جائیں، اور ریپ کیسز میں ملزم کو سزا دے کر نشان عبرت بنایا جائے۔
